ABŞ-nin Kaliforniya ştatında meşə yanğınları başlayıb. İlkin məlumata görə, azı üç nəfər xəsarət alıb.
Liderxeber.az bu barədə "ABC News" telekanalına istinadla xəbər verir.
Bildirilir ki, Los-Padres Milli Parkının ərazisində başlayan genişmiqyaslı meşə yanğınının söndürülməsinə 1000-dən çox xilasedici cəlb olunub.
"Yanğın San-Luis-Obispo və Santa-Barbara dairələrini əhatə edir. Hazırda alovun sahəsi 30 min hektara yaxındır", - deyə məlumatda qeyd edilir.
Əhali təhlükə altında olan yaşayış məntəqələrindən təxliyə edilir. Yanğının yayılması fonunda 460-a yaxın yaşayış evi və digər tikililər məhv olmaq təhlükəsi ilə üz-üzədir.
Ərazidə küləyin sürətinin artması alovun nəzarətə alınmasını çətinləşdirir. Yanğının səbəbləri ilə bağlı araşdırma aparılır.
Xatırladaq ki, Kaliforniyada yanvar ayının əvvəlində başlayan və təxminən 30 nəfərin həyatına son qoyan yanğını 25 gün sonra nəzarət altına almaq mümkün olmuşdu. Həmin müddətdə 200 000-dən çox insan təxliyə edilmiş, 18 000-dən çox tikili məhv olmuşdu.
