"Çapıq üz" filmində korrupsiyalaşmış "polis Mel Bernşteyn" rolunu oynayan aktyor Harris Yulin 87 yaşında vəfat edib.
Liderxeber.az-ın məlumatına görə, bu barədə "The People" onun yaxınlarına istinadən xəbər verir.
Bildirilir ki, çərşənbə axşamı Nyu-Yorkdakı evində onun ürəyi dayanıb.
"Yulin aktyorluq sənətinə ehtirasla yanaşan nəslin avanqardında idi", - ailə üzvləri mətbuat açıqlamasında qeyd ediblər.
Yulin 1937-ci ildə Los-Ancelesdə anadan olub. Onun filmoqrafiyasında 100-dən çox film var. O cümlədən "Kabus ovçuları"nın ikinci hissəsində, "Təlim günü" və "Başqa qadın" filmlərində rol alıb. 1996-cı ildə Yulin "Frazier"də "Qanqster" roluna görə "Komediya televiziya serialında ən yaxşı dəvət olunmuş aktyor" nominasiyasında "Emmy" mükafatına namizəd göstərilib, 2019-cu ildə isə "Ozark" serialı üzərində işinə görə ABŞ Kino Aktyorları Gildiyasının mükafatına namizəd olub. Yulinin hesabında, həmçinin altı Brodvey tamaşası var. Bu həftə o, baş rol aldığı "Amerika klassikası" serialı üzərində işə başlamalı idi.
