Yerli dəyərləri qoruyaraq qlobal uğurlar qazanan METAK, bu il də "Deloitte" beynəlxalq audit şirkətinin təşkil etdiyi "Best Managed Companies Azerbaijan 2025" müsabiqəsinin qalibi oldu.
Şirkətimiz ardıcıl dördüncü dəfə bu nüfuzlu mükafata layiq görülməklə ölkə tarixində nadir bir nailiyyətə imza atdı. Bu dəfəki uğurumuz isə xüsusilə əlamətdardır - METAK, "Qızıl Qalib" nominasiyası ilə təltif edilən Azərbaycanın ilk şirkəti oldu. Bu mükafat, uzunmüddətli və məqsədyönlü idarəetmə strategiyamızın, güclü liderlik modelimizin və dayanıqlı inkişaf siyasətimizin beynəlxalq səviyyədə təsdiqidir.
Strateji planlaşdırma, liderlik, insan kapitalının inkişafı və maliyyə idarəetməsi sahələrində əldə etdiyimiz yüksək nəticələr, bu prestijli qiymətləndirmə ilə bir daha sübut olundu. Nüfuzlu beynəlxalq münsiflər heyəti, bu sahələrdə göstərdiyimiz davamlı uğurları yüksək qiymətləndirib.
METAK olaraq biz 28 illik fəaliyyətimizdə həm "Made in Azerbaijan" brendinə, həm də innovativ idarəetmə mədəniyyətinə verdiyimiz dəyərlərlə seçilmişik. Bu gün 37 ölkədə həyata keçirilən "Best Managed Companies" proqramında Azərbaycanın dördqat qalibi kimi iştirak etməyimiz, ölkəmizi beynəlxalq arenada ləyaqətlə təmsil etdiyimizi nümayiş etdirir.
Bu uğur yalnız METAK komandasının deyil, bütövlükdə Azərbaycan biznes sektorunun inkişafına verilmiş dəyərin göstəricisidir. İrəliyə doğru atdığımız hər addımda, ölkəmizin adını qürurla daşımağa davam edəcəyik.
