ABŞ-nin Yaxın Şərqdəki ən böyük hərbi bazası olan "Əl-Udeyd" raket hücumuna məruz qalıb.
Liderxeber.az xəbər verir ki, bu barədə Qətərin Müdafiə Nazirliyi məlumat yayıb.
Xəbərə görə, hadisə nəticəsində ölən və yaralanan olmayıb. Bazaya dəyən maddi ziyanın da həcmi açıqlanmayıb.
Nazirlik bildirib ki, raketlərdən biri hava hücumundan müdafiə sistemi tərəfindən ələ keçirilsə də, digəri ABŞ-nin "Əl-Udeyd" aviabazasına düşüb.
Qətər Müdafiə Nazirliyi açıqlamasında, həmçinin ölkənin Silahlı Qüvvələrinin dövlətin suverenliyini və ərazisini qorumaq bütün imkanlara və resurslara malik olduğunu da bildirib. Nazirlik vətəndaşları sakitliyi qorumağa, təhlükəsizlik orqanlarının təlimatlarına əməl etməyə çağırıb.
Qeyd edək ki, "Əl-Udeyd" bazası ABŞ-nin Yaxın Şərqdə yerləşən ən böyük hərbi bazasıdır.
Xatırladaq ki, fevralın 28-də İsrailin müdafiə naziri İsrael Kats İsrail Müdafiə Qüvvələrinin İrana qabaqlayıcı zərbə endirdiyini açıqlayıb. Daha sonra ABŞ Prezidenti Donald Tramp ölkəsinin də İrana qarşı hərbi əməliyyatda iştirak etdiyini bildirib.
İran isə öz növbəsində İsrailə onlarla ballistik raket atıb. İsrail Müdafiə Qüvvələri atışları təsdiqləyib, ölkə daxilində sirenlər səslənib və hava hücumundan müdafiə sistemləri işə salınıb.
Martın 1-də İranın Ali Lideri Əli Xameneinin hücumlar zamanı öldürüldüyü bəyan olunub.
İran ABŞ-nin hərbi bazalarının yerləşdiyi qonşu ölkələrin əksəriyyətinə raket zərbələri endirib. Buna görə də həmin ölkələrdə hava məkanı müvəqqəti bağlanıb.
