Gül suyu xoş qoxusu, təbii və faydalı tərkibinə görə bir çox sahədə üstünlük verilən məhsuldur.
Liderxeber.az xəbər verir ki, qida, kosmetika, tibb, tibb və əczaçılıq kimi bir çox sektorda istifadə olunur.
Gül suyu içmək soyuqdəymə və boğaz ağrılarına yaxşı təsir edir. Əsəbləri rahatlaşdıraraq yorğunluğu aradan qaldırmağa yardımçı olur. Lakin daha çox dəriyə qulluq vasitəsi kimi gül suyu geniş tətbiq edilir.
Gül suyu dərinin nəm balansını qoruyur. Təbii tərkibə malik olduğu üçün nəmləndirir və bütün dəri tipləri üçün faydalıdır.
Gül suyu dəri üçün əla tonik hesab olunur. Makiyajdan sonra və gecə yatmazdan əvvəl üzü gül suyu ilə təmizləyərək parlaq və canlı dəriyə sahib olmaq olar.
Göz altı şişlərinə də yaxşı təsir göstərir. Pambıq vasitəsilə yorğun və yuxulu olan gözlərin alt nahiyəsinə çəkmək faydalıdır. Bir müddət sonra şişkinliyin azaldığını görmək mümkündür.
Dərinin pH balansını qoruyaraq ləkələrin aradan qaldırılmasında mühüm rol oynayır. Hava şəraitinə görə dəridə yığılan toksinlərin çıxarılmasına kömək edir. Tıxanmış məsamələri açır və dərinin hamar bir təbəqəyə sahib olmasını təmin edir. Daimi istifadə edildikdə, mat görünüşlü canlı dəriyə sahib olmaq olar.
Bundan əlavə, tərkibindəki güclü antioksidantlar sərbəst radikallarla mübarizə aparır, dəridə kollagen istehsalını dəstəkləyir və qırışların görünüşünü azaldır. Eyni zamanda dərinin elastikliyini artıraraq daha gənc görünüş təmin edir.
Gül suyu təkcə dəriyə qulluqda deyil, saç sağlamlığında da mühüm rol oynayır. Təbii xüsusiyyətləri sayəsində baş dərisini qidalandırır, saçları gücləndirir və parlaqlıq verir. Saça gül suyunu şampuna əlavə edərək və ya sprey vasitəsilə tətbiq etmək olar.
Gül suyu saç tellərini qidalandırır, onlara təbii parlaqlıq və yumşaqlıq verir.
Gül suyu hazırlamaq üçün kiçik bir qazanda su və gül ləçəklərini qarışdırın. Qaynamağa başlayanda istiliyi minimuma endirin. Gül ləçəklərinin rəngi daha açıq və şəffaf olana qədər gözləyin. Qapağı açmadan soyumağa qoyun və daha sonra istifadə edin.
Üzünüzə çəkdikdən sonra təxminən 10 dəqiqə gözləyə və dərinizi soyuq su ilə yuya bilərsiniz.
