Azərbaycan Respublikasının Müzəffər Prezidenti cənab İlham Əliyev bu günlərdə Hacıqabul rayonunda yenidən qurulacaq Şirvan suvarma kanalının təməlini qoydu.
Bu iri layihənin reallaşması ölkəmizin iqtisadi gücünü göstərməklə yanaşı, həm də inkişafı, tərəqqini qarşısına məqsəd qoyan dövlətimizin siyasətini nümayiş etdirir. Öz başlanğıcını Mingəçevir su anbarından götürən Yuxarı Şirvan suvarma kanalı 1958-ci ildə istifadəyə verilib. Ölkənin ikinci ən böyük kanalı olan Yuxarı Şirvan torpaq məcralı kanaldır. Bu isə öz növbəsində uzun illər ərzində kanalın böyük su itkisi ilə işləməsinə şərait yaradıb. Yuxarı Şirvan suvarma kanalının infrastrukturunun bərpası, habelə mövcud təsərrüfatların su təminatı məsələlərinin vaxtında və səmərəli şəkildə həllinin dəstəklənməsi, su ehtiyatlarından daha səmərəli istifadə olunması, magistral kanalın suburaxma qabiliyyətinin artırılması məqsədilə cari ilin aprel ayının 8-də ölkə başçısı cənab İlham Əliyev Şirvan suvarma kanalının yenidən qurulması haqqında Sərəncam imzalamışdır. Sərəncama əsasən, Yuxarı Şirvan suvarma kanalının adı dəyişdirilərək Şirvan suvarma kanalı adlandırılıb. Yenidən qurulduqdan sonra 230 min hektar əkin sahəsini əhatə edəcək bu kanal vasitəsilə geniş ərazilər əkin dövriyyəsinə cəlb ediləcəkdir.
Qeyd edək ki, bu kanal vasitəsilə suvarılacaq ərazilərin böyük hissəsi yeni suvarılacaq əkin sahələri olacaqdır. 10 rayonu əhatə edəcək bu layihənin son nöqtəsi on ildən çoxdur ki, tamamilə qurumuş Hacıqabul gölü olacaq. Cənab Prezident təməlqoyma mərasimində bu məsələni xüsusi vurğuladı. Bəli, Hacıqabul gölü Kanal istifadəyə veriləndən sonra dolacaq və bunun da təbiətə çox müsbət təsir edəcəkdir. Görünən odur ki, son iyirmi il ərzində həyata keçirilmiş islahatlar, infrastruktur layihələr nəticəsində Azərbaycan davamlı inkişafa nail olub.
Fərqanə Ağalarova;
Neftçala rayonu, müəllim
