İspaniyanın “Real Madrid” klubunda çıxış edən Avstriya yığmasının futbolçusu David Alaba AVRO-2024-ün seçmə mərhələsində Azərbaycan millisi ilə oyunu buraxa bilər.
“Nachrichten” nəşrin-nin məlumatına görə, buna səbəb müdafiəçinin Çempionlar Liqasının 1/8 final mərhələsində İngiltərə təmsilçisi “Liverpul”la keçirilən oyunda zədələnməsidir.
Ulduz futbolçu komandasının səfərdə 5:2 hesabı ilə qalib gəldiyi qarşılaşmanın 27-ci dəqiqəsində bud nahiyəsindən xəsarət alaraq əvəzlənib. Avstriya millisinin kapitanının bu üzdən “Rayffeysen Arena”da Azərbaycan və Estoniya yığmalarına qarşı keçiriləcək seçmə mərhələ görüşündə iştirakı sual altına düşüb.
Qeyd edək ki, Avstriya yığması martın 24-də Azərbaycan millisini, üç gün sonra isə Estoniya seçməsini qəbul edəcək
