Buradakı şəraitdən razıyıq, bundan lap yaxşı olmur.
Liderxeber.az xəbər verir ki, bunu təyyarə qəzasından sonra Qazaxıstandan Azərbaycana gətirilən Zaqatala rayon sakini Nurulla Siracov söyləyib.
“Barmağım qırılıb, gipsdədir, bir də əziklərim var. Qazaxıstanda bizə yaxşı baxdılar. Burda da yaxşı qayğımıza qalırlar. Bütün şəraitdən razı qaldıq. Bundan yaxşı olmur – o qədər yaxşı baxırlar”, – o qeyd edib.
Siracov həyat yoldaşından bixəbər olduğunu vurğulayıb: “Yoldaşımın harada, necə olduğunu bilmək istərdim. Onunla görüşməyə tələsirəm. Təyyarədə yanaşı oturmuşduq. Ondan sonra onu görməmişəm. Bircə darıxdığım yoldaşımdır”.
Xatırladaq ki, AZAL-a məxsus Bakı-Qroznı aviareysini həyata keçirən sərnişin təyyarəsi dekabrın 25-də Qazaxıstanın Aktau şəhəri yaxınlığında qəzaya uğrayıb. Avialaynerin göyərtəsində olan 67 nəfərdən 38-i həlak olub, 29-u sağ qalıb.
