Sosial şəbəkələrdə Göygöl rayon ərazisindəki binalardan birinin divarlarına yapışdırılmış şəhid şəkillərinin üzərinin boyanması ilə bağlı görüntülər yayılıb.
Liderxeber.az xəbər verir ki, həmin görüntülərdə şəhidlərin şəkillərinin üzərinin rəngləndiyi əks olunub.
Bu barədə aparıcı-prodüser Tarix Əliyev (Tolik) də sosial media hesabında paylaşım edərək həmin görüntüləri gündəmə gətirib. O qeyd edib ki, şəkillərin rənglənməsi əvəzinə, onları çıxararaq ailələrinə müvəqqəti təhvil vermək olardı. Aparıcı hadisənin Göygöl rayonunda baş verdiyini də vurğulayıb:
Məsələ ilə bağlı Göygöl Rayon İcra Hakimiyyətinə müraciət ünvanladıq. Qurumdan “Qafqazinfo”nun sorğusuna belə cavab verildi:
“Göygöl şəhərinin küçələrinin divarlarına çəkilmiş 4 şəhid şəklinin silinməsi ilə bağlı bildiririk ki, həmin şəkillər çox pis vəziyyətdə idi. Bu şəkillər təxminən 2020-ci ildə çəkilib, üzərindən 5 il keçdiyi üçün şəkillərin yarısı silinib və biabırçı vəziyyətə düşüb. Əlavə olaraq bildiririk ki, şəhidlər bizim and yerimizdir, onların ruhlarının qarşısında baş əyirik. Qanunvericiliyin tələblərinə uyğun olaraq Göygöl rayonu üzrə şəhidlərin adları əbədiləşdirilib. Eyni zamanda l və ll Qarabağ Müharibəsi, Aprel, Antiterror və digər döyüşlərdə həlak olmuş 175 şəhidin xatirəsinə “Şəhidlər Memorial Kompleksi” yaradılır, ilin sonuna təhvil verilməsi nəzərdə tutulur”.
