1845-ci ildə Arktikada itkin düşən məşhur Franklin ekspedisiyasının bəzi üzvlərinin kimliyi təxminən 180 ildən sonra DNT analizləri vasitəsilə müəyyən edilib.
Liderxeber.az xəbər verir ki, İngiltərədən yeni dəniz marşrutu tapmaq məqsədilə yola çıxan Con Franklinin rəhbərlik etdiyi ekspedisiyada həlak olan dörd dənizçinin qalıqları müasir genetik texnologiyalar sayəsində tanınıb.
Alimlər Arktikada tapılmış sümük fraqmentlərini ekspedisiya üzvlərinin nəslindən götürülən DNT nümunələri ilə müqayisə edərək nəticəyə gəliblər. Müəyyən olunan şəxslərin “HMS Erebus” və “HMS Terror” gəmilərində xidmət etdikləri bildirilib.
Tədqiqatın ən diqqətçəkən nəticələrindən biri uzun illər kimliyi mübahisə doğuran Harri Peqların qalıqlarının müəyyən edilməsi olub. Onun fərqli rütbəyə aid forma ilə tapılması səbəbindən illərlə yanlış tanındığı qeyd edilir.
DNT analizləri nəticəsində həmin qalıqların, həqiqətən, Peqlara məxsus olduğu təsdiqlənib və bununla da 166 illik mübahisəyə son qoyulub.
Alimlər hesab edirlər ki, dənizçi intizam pozuntusuna görə vəzifəsindən uzaqlaşdırıldıqdan sonra başqa forma geyinmiş ola bilər.
Araşdırma zamanı ekspedisiyada həyatını itirən şəxslərin şəxsi həyatları barədə də yeni məlumatlar əldə olunub. Onların arasında 11 yaşında dənizçiliyə başlayan musiqiçi və 17 yaşında ekspedisiyaya qatılan gənc heyət üzvünün olduğu bildirilir.
Bildirilir ki, gələcəkdə digər qohumlardan götürüləcək DNT nümunələri vasitəsilə Franklin ekspedisiyasının daha çox qurbanının kimliyini müəyyən etmək mümkün olacaq.
