Venesuelada paytaxt Karakas yaxınlığında baş verən 7,2 və 7,5 bal gücündə iki dağıdıcı zəlzələdən sonra axtarış-xilasetmə əməliyyatları davam edir. Son rəsmi məlumata görə, təbii fəlakət nəticəsində azı 235 nəfər həlak olub, 4300-dən çox insan yaralanıb.
Liderxeber.az xəbər verir ki, xilasetmə qrupları Karakas və sahilyanı La Quayra şəhərində dağıntılar altında qalan insanları xilas etmək üçün zamana qarşı mübarizə aparır.
Hakimiyyət orqanları 40 mindən çox şəxsin itkin düşmüşlər siyahısında olduğunu açıqlayıb. Bu səbəbdən ölənlərin sayının daha da arta biləcəyi ehtimal edilir.
ABŞ Geoloji Xidmətinin məlumatına görə, ilk zəlzələ 7,2 bal gücündə olub, cəmi 39 saniyə sonra isə 7,5 bal gücündə ikinci, daha güclü təkan qeydə alınıb. Zəlzələlərin 21,9 və 10 kilometr dərinlikdə baş verməsi dağıntıların miqyasını daha da artırıb.
Təkanlar ölkədə milli bayram zamanı baş verdiyindən insanların böyük hissəsi evlərində olub. Minlərlə sakin evləri yararsız vəziyyətə düşdüyü üçün gecəni küçələrdə keçirməli olub.
Müvəqqəti Prezident Delsi Rodriges ölkədə fövqəladə vəziyyət elan edib. Milli Assambleyanın sədri Xorxe Rodriges ölənlərin sayının artmaqda davam etdiyini bildirib. Karakasla yanaşı, Truxilyo, Yarakuy, Karabobo, Araqua və Miranda ştatları da ciddi zərər görüb.
Çakao rayonunun meri Qustavo Duke bildirib ki, təkcə bir yaşayış binasının uçması nəticəsində 11 nəfər ölüb, 23 nəfər isə dağıntılar altından sağ çıxarılıb.
Paytaxt yaxınlığındakı Simon Bolivar Beynəlxalq Hava Limanı tavanların çökməsi və ciddi zədələr səbəbindən fəaliyyətini dayandırıb. Bölgədə indiyədək 30-dan çox təkrar təkan qeydə alınıb, elektrik və internet kəsintiləri isə xilasetmə və ziyanın qiymətləndirilməsi işlərini çətinləşdirir.
Fəlakətdən sonra beynəlxalq yardım kampaniyası da başlayıb. ABŞ Venesuelaya axtarış-xilasetmə əməliyyatlarını dəstəkləmək üçün 150 milyon dollarlıq yardım ayırdığını açıqlayıb. ABŞ Prezidenti Donald Tramp bütün aidiyyəti qurumlara operativ hərəkət etmək tapşırığı verdiyini bildirib.
Türkiyə, Meksika, Salvador, Dominikan Respublikası və Qətər də zərərçəkən bölgələrə axtarış-xilasetmə qrupları və tibbi yardım göndərdiklərini açıqlayıblar.
