İsrailin Bakıdakı səfirliyi Azərbaycan Respublikasının Daxili İşlər Nazirliyi və digər hüquq-mühafizə orqanları ilə birgə öz binasında təlim keçirib.
LiderXəbər xəbər verir ki, bu barədə İsrailin Azərbaycandakı səfirliyinin "X" hesabında məlumat verilib.
Bildirilib ki, fevralın 18-də baş tutan təlim iki ölkə arasında təhlükəsizlik sahəsində əməkdaşlığı möhkəmləndirməyə və genişləndirməyə yönəlmiş davamlı əməkdaşlığın bir hissəsidir.
İsrailin Azərbaycandakı səfiri Corc Dik təlimin uğurlu keçdiyini bildirib.
"Biz səfirliyin və diplomatik heyətin təhlükəsizliyini təmin etdiklərinə görə Azərbaycan Respublikasının hüquq-mühafizə və təhlükəsizlik orqanlarına minnətdarıq. Bu birgə təlim çox uğurlu keçdi və ölkələrimizin möhkəm təhlükəsizlik əməkdaşlığına mühüm əlavə idi. Azərbaycan dövlətinin, bütün diplomatik nümayəndəliklərin, o cümlədən İsrail səfirliyinin təhlükəsizliyinə sadiqliyi göz qabağındadır və sarsılmazdır. Biz ikitərəfli əməkdaşlığımızı gücləndirməyə davam etməyi səbirsizliklə gözləyirik", - İsrail diplomatı vurğulayıb.
