Azərbaycan Beynəlxalq Daşıyıcıları Assosiasiyası (ABADA) Masallı rayonunda avtodaşıyıcılarla görüş keçirib.
ABADA-dan LiderXəbər-ə bildirilib ki, “Hər sürücü bir qəhrəmandır” devizi altında bölgələrdə keçirilən görüşlərdə tədbirlər planına uyğun olaraq ABADA-nın rəhbərliyi və İdarə Heyətinin üzvləri ölkənin cənub bölgəsi üzrə beynəlxalq avtomobil daşımaları fəaliyyəti ilə məşğul olan avtodaşıyıcılarla görüşüb.
Görüşdə 30-dan artıq şirkətin nümayəndəsi və sürücü iştirak edib. Məqsəd, avtodaşıyıcıların fəaliyyətləri ilə bağlı rastlaşdıqları problemlər, beynəlxalq avtomobil daşımaları sahəsində yeni qəbul olunan normativ-hüquqi sənədlər barədə maarifləndirmək, sürücülərin peşə hazırlığı sahəsində görülən işlər, yeni iş yerlərinin açılması istiqamətləri və digər aktual məsələləri müzakirə etmək olub.
ABADA-nın Baş katibi Kənan Qurbanov Assosiasiyanın 6 ay ərzində həyata keçirdiyi tədbirlər, yeni layihələr və görülən işlər barədə hesabatla çıxış edib.
Görüşdə daşıyıcıları maraqlandıran məsələlərə aydınlıq gətirilib, verilən suallar cavablandırılıb. Peşəyə marağın artırılması üçün mütəxəssis rəyləri dinlənilib.
Yekunda beynəlxalq daşımalar sahəsində fərqlənən sürücülər mükafatlandırılıb.
