ABŞ və İsrailin İrana hücumları ilə başlayan müharibə fonunda “The Washington Post” qəzeti İranın bölgədəki ABŞ hərbi obyektlərinə əvvəl açıqlanandan daha çox zərbə endirdiyini yazıb.
Liderxeber.az xəbər verir ki, nəşrin peyk görüntülərinə əsaslanan araşdırmasına görə, İranın hava hücumları nəticəsində Yaxın Şərqdə ABŞ-yə məxsus ən azı 228 obyekt və avadanlıq zədələnib və ya məhv edilib.
Bu göstəricinin ABŞ hökumətinin indiyədək açıqladığı rəqəmlərdən xeyli yüksək olduğu qeyd olunur.
Bildirilir ki, hücumlar zamanı anqarlar, kazarmalar, yanacaq anbarları, təyyarələr, eləcə də, radar və hava hücumundan müdafiə sistemləri hədəfə alınıb. Vurğulanır ki, dağıntıların miqyası rəsmi məlumatlardan daha böyükdür.
Qəzetin məlumatına görə, İran dövlətinə bağlı media tərəfindən yayımlanan görüntülər müxtəlif peyk sistemləri ilə müqayisə edilərək təsdiqlənib. Bununla yanaşı, bəzi iri peyk görüntüsü təminatçılarının məlumat paylaşımını məhdudlaşdırması zərərin real miqyasını qiymətləndirməyi çətinləşdirir.
Araşdırmada iştirak edən analitiklərdən biri – ABŞ Dəniz Piyadalarının ehtiyatda olan polkovniki Mark Kançian bildirib ki, hücumlar yüksək dəqiqliklə həyata keçirilib və təsadüfi zərbələrin izlərinə rast gəlinməyib.
Məlumata əsasən, İranın zərbələri regiondakı bir sıra mühüm ABŞ hərbi obyektlərini, o cümlədən, Qətər, Bəhreyn və Küveytdə yerləşən bazaları əhatə edib.
ABŞ ordusunun açıqlamasına görə, fevral ayının sonundan bəri bölgədəki hücumlar nəticəsində 7 amerikalı hərbçi həlak olub, 400-dən çoxu yaralanıb.
