Alkoqol, qızardılmış qidalar, kofein, rafinə edilmiş karbohidratlar, şəkər və duzluluq miqdarı yüksək olan məhsullar kortizol kimi stres hormonlarının ifrazını stimullaşdıra bilər.
Liderxeber.az-ın xəbərinə görə, bu barədə ABŞ-dən olan diyetoloq Şelli Bolls "WellnessPulse" nəşrinə verdiyi müsahibədə danışıb.
Çoxsaylı araşdırmalar göstərir ki, düzgün olmayan qidalanma ilə stres bir-birinə birbaşa təsir göstərə bilər.
Şelli Bollsun sözlərinə görə, rasionda yüksək şəkər miqdarına malik çoxlu bişmiş məmulatların, çörək və sənaye üsulu ilə hazırlanan şirniyyat və içkilərin olması qanda qlükoza səviyyəsinin artmasına səbəb olur. Qanda şəkər səviyyəsinin qeyri-sabitliyi, bəzi alimlərin fikrincə, qəzəb, narahatlıq və əsəbilik kimi əhvali-ruhiyyə pozuntularına yol aça bilər.
Qlükozanın ilkin yüksəlişindən sonra səviyyənin kəskin şəkildə enməsi enerji çatışmazlığına səbəb olur. Bu da iş qabiliyyətini azaldır, gündəlik vəzifələrin yerinə yetirilməsini çətinləşdirir və nəticədə stres və narahatlığın artmasına gətirib çıxarır.
Diyetoloq onu da əlavə edib ki, qanda şəkər səviyyəsinin dəyişməsinə səbəb olan qidalar eyni zamanda, orqanizmdə iltihab proseslərini də gücləndirə bilər. Hər iki vəziyyət kortizol kimi stres hormonlarının artmasına səbəb olur. Rafinə edilmiş karbohidratlar (ağ çörək, makaron, un məhsulları) və alkoqol iltihab və şəkər dalğalanmalarının əsas səbəbkarları kimi göstərilir.
Orqanizmdə ümumi iltihabi reaksiyalar, həmçinin duzlu, qızardılmış qidaların və kofeinin həddindən artıq istifadəsi zamanı da güclənə bilər. Əvəzində, toyuq və kəsmikdəki yağsız proteinlər, qoz-fındıq və balıqda olan faydalı yağlar, eləcə də liflə zəngin meyvə və tərəvəzlər iltihab əleyhinə təsir göstərərək stresin azaldılmasına kömək edə bilər.
