Fələstin Dövlətinin iqtidarı “Al Jazeera” telekanalını “təxribat xarakterli məzmun” yayımlamaqda ittiham edərək onun fəaliyyətini müvəqqəti dayandırıb.
Liderxeber.az xəbər verir ki, bu barədə ölkənin Fələstin Xəbər və İnformasiya Agentliyi (WAFA) məlumat yayıb.
“Mədəniyyət, Daxili İşlər və Telekommunikasiya Nazirliklərinin nümayəndələrindən ibarət Fələstin Nazirlər Komitəsi Qətərdə yerləşən “Al Jazeera” media şəbəkəsinin Fələstindəki yayım fəaliyyətinin dayandırıldığını elan edib”, – agentlik diqqətə çatdırıb.
Qeyd olunub ki, FƏTH iqtidarı telekanal ilə əlaqəli “bütün jurnalistlərin, işçilərin və bağlı kanalların işinin müvəqqəti dayandırılmasına qərar verib”.
“Qərar, şəbəkə Fələstində tətbiq olunan qanun və qaydalara zidd hesab edilən hüquqi statusunu həll edənə qədər qüvvədə qalacaq”, – məlumatda vurğulanıb.
Bildirilib ki, yayım fəaliyyətinin dayandırılmasının səbəbi yerli telekanalın yerli qanunları “dəfələrlə pozması” olub: “İqtidar orqanları kanalı təxribat xarakterli məzmun yayımlamaqda, dezinformasiya yaymaqda və Fələstinin daxili işlərinə müdaxilə etməkdə ittiham edərək bunun bölgədə ixtilaf və qeyri-sabitlik yaratdığını iddia ediblər”.
Bununla belə, sözügedən qadağanın rəsmi Ramallahın nəzarətində olmayan Qəzza zolağında keçərli olmayacağı güman edilir.
“Al Jazeera” qəbul edilmiş qərarı “işğal olunmuş ərazilərdə baş verən hadisələri işıqlandırmaqdan çəkindirmək cəhdi” adlandırıb və iqtidarı bu qərarı ləğv etməyə, jurnalistlərə sərbəst fəaliyyət göstərmək imkanı verməyə çağırıb.
Qeyd edək ki, ötən ilin sentyabrında İsrail Müdafiə Qüvvələri Ramallahda “Al Jazeera”nın ofisinə basqın edərək onu bağlayıb. Ondan aylar öncə isə İsrail sözügedən telekanalın yəhudi ölkəsindəki fəaliyyətini yasaqlamışdı.
