Respublikaçılar Partiyasının namizədi, ABŞ-ın keçmiş prezidenti Donald Tramp və Demokratlar Partiyasının namizədi, ABŞ vitse-prezidenti Kamala Harrisin gərgin rəqabətli seçki prosesi başa çatıb. Donald Tramp rəqibi Harrisi geridə qoyaraq ABŞ-ın 47-ci prezidenti olub.
Bəs, aylarla davam edən seçki prosesində Donald Trampın vədləri nə idi? Amerika xalqı hansı vədlərə görə Donald Trampı yenidən ABŞ prezidenti edib?
Liderxeber.az xarici mətbuata istinadən, ABŞ-ın 47-ci prezidenti Donald Trampın "seçki vədləri"ni təqdim edir.
İnflyasiyaya son qoymaq
Donald Tramp inflyasiyaya son qoyacağına söz verib. İnflyasiya bitdikdə hər kəsin rahatlayacağını bildirən Tramp Amerikanı yenidən münasib qiymətlər olan hala gətirəcəyinə söz verib və faizləri aşağı salacağını iddia edib.
Sosial təminat müavinətlərinin vergisini ləğv etmək
Vergi Siyasəti Mərkəzinin məlumatına görə, Tramp bəxşişlər üzərindrə vergiləri də ləğv etsə, demək olar ki, bütün bəxşiş alan işçilər müəyyən qədər vergi güzəşti əldə edəcəklər. Bununla belə, bu işçilər təqaüdə çıxdıqda daha az sosial müdafiə ödənişləri alacaqlar.
Yaşlı vətəndaşların diqqətini cəlb etməyi hədəfləyən Tramp, sosial müdafiə müavinətləri alanların artıq aylıq ödənişlərinə görə vergi ödəməyəcəklərinə söz verib.
Aborta qadağa
Donald Tramp abortla bağlı qeyri-müəyyən açıqlamalar verərək seçicilərin reaksiyasına səbəb olub. Daha əvvəl ölkə miqyasında abort qadağası tətbiq edəcəyini bildirən Tramp Floridada hamiləliyin 6-cı ayından sonra abort qadağası qərarını tənqid etmiş və abort əleyhinə olan tərəfdarlarından sərt reaksiya görmüşdü. Tramp bu məsələ ilə bağlı açıqlamalarına daha sonra heç vaxt aydınlıq gətirməyib.
Qeyri-qanuni miqrantlara qarşı sərt tədbir
Donald Tramp qeyri-qanuni miqrantlara qarşı sərt mövqe nümayiş etdirir. Tramp sərhəd divarını tamamlamaq və təhlükəsizliyi artırmaqla sərhədi bağlayacağını və ölkəni naməlum mühacirlərdən və cinayətkar qaçqınlardan qoruyacağını vəd edib.
Tramp həmçinin qeyri-qanuni mühacirlərə qarşı ABŞ tarixində ən böyük deportasiya proqramını həyata keçirməyə söz verib.
Rusiya-Ukrayna müharibəsini bitirmək
Donald Tramp ABŞ-ı beynəlxalq siyasətdən təcrid edəcək xarici siyasət yürüdür və Vaşinqtonun özünü dünya münaqişələrindən təcrid etməsini istəyir. 47-ci prezident Rusiya ilə danışıqlar apararaq 24 saat ərzində Ukraynada müharibəni bitirəcəyini vəd edir.
Tramp özünü İsrailin sadiq tərəfdarı kimi təqdim edir, lakin Qəzzada müharibəni necə bitirəcəyi barədə çox az danışıb.
Səhiyyəni daha əlçatan etmək
Trampın birinci prezidentliyi dövründə səhiyyəyə diqqət yetirilirdi. Lakin onun hazırkı kampaniyasında buna eyni əhəmiyyət verilməyib.
Sentyabr ayında keçirilən debatda Tramp səhiyyə üçün yeni plan yaratdığını eyham etdi, lakin detallara çox dərindən getməyib.
