Böyük Britaniya Hörmüz boğazında hərəkəti bərpa etmək və bu dəhlizdən keçən gəmiləri müşayiət etmək üçün beynəlxalq koalisiyaya rəhbərlik etməyə hazırlaşır.
Liderxeber.az xəbər verir ki, bu barədə "The Times" və "The Telegraph" qəzetləri məlumat yayıb.
Bildirilib ki, Britaniya Fransa ilə birlikdə boğazın gəmiçilik üçün açılması planını hazırlayır və bu planın həyata keçirilməsi üçün ABŞ-nin dəstəyi tələb olunur.
"The Telegraph"ın yazdığına görə, plan İranın yerləşdirdiyi dəniz minalarını aşkar etmək və zərərsizləşdirmək məqsədilə mülki gəmilərin icarəyə götürülməsini nəzərdə tutur. Bu gəmilər uzaqdan idarə olunan və avtonom mina əleyhinə dronların yerləşdirilməsi və buraxılması üçün istifadə ediləcək.
Nəşrin məlumatına görə, Böyük Britaniyanın hərbi rəhbərliyi paralel olaraq bir neçə "Bay" sinifli yardımçı desant gəmisinin mina əleyhinə əməliyyatlar üçün platformalara çevrilməsi imkanını da araşdırır.
Amerikalı rəsmilərin fikrincə, İran Hörmüz boğazında 12-yə qədər mina yerləşdirib.
