Qazaxıstanda prezident təkrar seçilmək imkanı olmadan 7 illik müddətə seçiləcək.
Liderxeber.az xəbər verir ki, bu barədə “Kazaxstanskaya pravda” qəzetində dərc olunmuş ölkənin yeni Konstitusiya layihəsində qeyd edilir.
Bildirilir ki, ölkənin birinci şəxsi 7 il müddətinə ümumi, bərabər və birbaşa seçki hüququ əsasında gizli səsvermə yolu ilə seçiləcək.
“Konstitusiyaya uyğun olaraq eyni şəxs bir dəfədən çox Qazaxıstan Respublikasının Prezidenti seçilə bilməz”, - Konstitusiya layihəsində deyilir.
Xatırladaq ki, Qazaxıstanın yeni Konstitusiyasının layihəsi 2026-cı il fevralın 12-də kütləvi informasiya vasitələrində dərc edilib. Ötən gün Qazaxıstan Prezidenti Kasım-Jomart Tokayev martın 15-i ölkənin yeni konstitusiyası üzrə referendumun keçirilməsi haqqında Fərman imzalayıb. Qəbul ediləcəyi təqdirdə, yeni sənəd 1 iyul tarixində qüvvəyə minəcək.
