ABŞ Prezidenti Donald Tramp Kanadanın ABŞ-də yerləşən “Gulfstream Aerospace” şirkətinə məxsus bəzi təyyarə modellərini sertifikatlaşdırmaqdan imtina etməsinə cavab olaraq, Kanadada istehsal edilən bütün təyyarələr üçün ABŞ sertifikatının ləğv edildiyini açıqlayıb.
Liderxeber.az xəbər verir ki, o, bu barədə “Truth” sosial şəbəkəsindəki hesabında yazıb.
Prezident Kanadadan ABŞ-yə satılan bütün təyyarələrə 50 faiz tarif tətbiq ediləcəyi barədə xəbərdarlıq edib.
Tramp Kanadanın “Gulfstream 500”, “600”, “700” və “800” modellərini sertifikatlaşdırmaqdan imtina etməsini “ədalətsiz və qanunsuz” adlandırıb.
O bildirib ki, “Gulfstream” tam şəkildə sertifikatlaşdırılana qədər “Bombardier Global Express” təyyarələri də daxil olmaqla, Kanadada istehsal olunan bütün təyyarələr ABŞ tərəfindən sertifikatsız hesab ediləcək.
O, “Gulfstream”in əla ABŞ şirkəti olduğunu vurğulayaraq, sözügedən təyyarələrin illər əvvəl sertifikatlaşdırılmalı olduğunu qeyd edib.
Prezident Kanadanı sertifikatlaşdırma prosesi vasitəsilə “Gulfstream” təyyarələrinin ABŞ bazarında satışını faktiki olaraq əngəlləməkdə ittiham edib.
O əlavə edib ki, bu məsələ dərhal həll edilmədiyi təqdirdə, Kanadadan ABŞ-yə satılan bütün təyyarələrə 50 faizlik gömrük rüsumu tətbiq olunacaq.
