Bu gün səhər saatlarında Bakı metrosunun işində problem yaranıb.
Liderxeber.az xəbər verir ki, bu barədə sərnişinlər məlumat veriblər.
Məsələ ilə bağlı "Bakı Metropoliteni" QSC-yə sorğu ünvanladıq.
Qurumun Mətbuat Xidmətinin rəhbəri Bəxtiyar Məmmədov açıqlamasında bildirilib ki, metronun "Azadlıq Prospekti" stansiyasında vaqon qapılarına baxış keçirilməsi zərurəti yaranıb:
"Maşinist problem müəyyən etməsə də, təkrar baxış zərurətinə görə, qatar sərnişinsiz "Memar Əcəmi" stansiyasına yola salınıb. Dərhal əvəzinə qatar verilib. Nəticədə, "28 May" stansiyasına qədər intervaldan əlavə 5 dəqiqə yubanma yaranıb".
B.Məmmədov qeyd edib ki, vaqon qapılarında problem olmadığından qatar hərəkət qrafikinə uyğun xəttə qaytarılacaq.
