Uşaq hüquqlarına dair meyarlar sənədi yaxın günlərdə hökumətə təqdim ediləcək.
Liderxeber.az xəbər verir ki, bunu Ailə, Qadın və Uşaq Problemləri üzrə Dövlət Komitəsinin Hüquqi təminat şöbəsinin müdiri Taliyə İbrahimova iyunun 11-də Bakıda keçirilən BMT-nin Uşaq Hüquqları Komitəsinin (CRC) 92-ci sessiyasında Azərbaycan Hökumətinin dövri məruzəsinə əsasən CRC tərəfindən qəbul edilən yekun müşahidələrin müzakirəsində deyib.
Onun sözlərinə görə, qısamüddətli mühafizə orderlərinin verilməsi ilə bağlı prosedur mürəkkəb idi: "Ancaq indi müraciət daxil olan kimi 24 saat ərzində mühafizə orderinin verilməsi nəzərdə tutulur. Mühafizə orderinin verilməsi ilə bağlı proseduru dərhal həyata keçirməyən vəzifəli şəxs isə məsuliyyətə cəlb olunacaq. Hazırda əsas çatışmazlıq uşaqlarla bağlı məsələlərin icraat prosesində xüsusi hazırlıq keçmiş hakimlər, müstəntiqlər və digər vəzifəli şəxslərin iştirak etməməsidir. Düzdür, uşaqlardan ifadə alınmasında xüsusi hazırlıq keçən müstəntiqlər iştirak edir, amma bu məsələ tam şəkildə həyata keçirilmir".
T.İbrahimova bildirib ki, uşaq strategiyasının yerinə yetirilməsi ilə bağlı fəaliyyət planında nəzərdə tutulmuş dövlət və qeyri-dövlət sosial müsissələrində xidmətin keyfiyyətinə dair tələblər və bütün sahələrdə uşaq hüquqlarının təmin edilməsi ilə bağlı meyarlar haqqında layihələr yaxın günlərdə Nazirlər Kabinetinə təqdim ediləcək.
