“2024-cü ilin əvvəlində dövlət əsaslı vəsait qoyuluşu xərclərində Naxçıvan Muxtar Respublikasının Nazirlər Kabinetinə ümumi adla qeyd olunmuş 2 layihə üzrə 249,1 mln. manat nəzərdə tutulub”.
Liderxeber.az xəbər verir ki, bunu Hesablama Palatasının sədri Vüqar Gülməmmədov Milli Məclisin İqtisadi siyasət, sənaye və sahibkarlıq komitəsinin bu gün keçirilən iclasında “Azərbaycan Respublikasının 2024-cü il dövlət büdcəsinin icrası haqqında” Qanun layihəsinin müzakirəsi zamanı bildirib.
“O cümlədən, “Naxçıvan Muxtar Respublikasının sosial-iqtisadi inkişafına dair 2023-2027-ci illər üçün Dövlət Proqramı”nda nəzərdə tutulan tədbirlərin maliyyələşdirilməsi” layihəsi üzrə 70,0 mln. manat və “Naxçıvan Muxtar Respublikasının sosial-iqtisadi inkişafına dair 2023-2027-ci illər üçün Dövlət Proqramı”nda nəzərdə tutulan tədbirlərin maliyyələşdirilməsi üzrə ehtiyat” layihəsi üzrə 179,1 mln. manat nəzərdə tutulub. Dövlət büdcəsinə yenidən baxılma zamanı 2 layihə üzrə nəzərdə tutulmuş vəsait 42 layihəyə, hesabat ilinin sonuna isə 52 layihəyə bölüşdürülməklə ümumi nəzərdə tutulmuş vəsait 83,3% azaldılaraq 41,7 mln. manat təşkil edib”, - deyə sədr bildirib.
