Almaniya və Azərbaycan arasında əməkdaşlıq təkcə ikitərəfli münasibətlərlə məhdudlaşmır, eyni zamanda Avropa İttifaqı - Azərbaycan əlaqələrinin inkişafına da töhfə verir
Almaniya Azərbaycanın Avropadakı əsas iqtisadi tərəfdaşlarından biridir. İki ölkə arasında ticarət dövriyyəsi ildən-ilə artdığını müşahidə edirik. Almaniya şirkətlərin Azərbaycan bazarında daha aktiv iştirak etmək niyyətində olduğu görürük. Bu gün Almaniya şirkətləri ölkəmizdə əsasən sənaye, energetika, nəqliyyat, kənd təsərrüfatı və texnologiya sahələrinə maraq göstərir.
Almaniya Federativ Respublikasının Prezidenti Frank-Valter Ştaynmayerin bu günlərdə Azərbaycana səfəri iki ölkə arasında münasibətlərin daha da möhkəmlənməsinə xidmət edəcək. Almaniya və Azərbaycan arasında əməkdaşlıq təkcə ikitərəfli münasibətlərlə məhdudlaşmır, eyni zamanda Avropa İttifaqı–Azərbaycan əlaqələrinin inkişafına da töhfə verir. Qlobal miqyasda enerji təhlükəsizliyinin və nəqliyyat dəhlizlərinin aktuallığı fonunda Almaniya kimi aparıcı Avropa dövləti ilə əməkdaşlığın genişləndirilməsi Azərbaycanın strateji maraqlarına uyğundur. Almaniya Avropa İttifaqının ən böyük iqtisadi gücü olaraq Azərbaycan üçün mühüm ticarət və investisiya tərəfdaşıdır. Səfər zamanı enerji sahəsində yeni əməkdaşlıq istiqamətləri müzakirə edilmiş və bu məqam əsas məsələlərdən biri olmuşdur. Bu gün Azərbaycan “yaşıl enerji” layihələri və Cənub Qaz Dəhlizi vasitəsilə Avropanın enerji təhlükəsizliyinə töhfəsini artırmağı hədəfləyir.
Almaniya şirkətlərinin Azərbaycanın bərpa olunan enerji sektoruna cəlb olunması müzakirə mövzularından biridir. Almaniyanın yüksək texnologiyalar və sənaye sahəsində təcrübəsi Azərbaycanın iqtisadi diversifikasiyası üçün vacibdir. Səfər çərçivəsində kənd təsərrüfatı, sənaye və rəqəmsal texnologiyalar üzrə əməkdaşlıq məsələləri əsas müzakirə predmetlərindən olmuşdur. Tarixən Almaniya və Azərbaycan arasında mədəni və təhsil sahəsində əlaqələr geniş inkişaf edib.
Səfər çərçivəsində alman dili və təhsil proqramlarının dəstəklənməsi, eləcə də elm və akademik mübadilə məsələləri müzakirə edilmişdir. Almaniya Qafqaz regionunda əbədi sülhün və təhlükəsizliyin təmin olunmasını istəyən dövlətlərdən biridir. Frank-Valter Ştaynmayerin Azərbaycana səfəri regional sülh danışıqları və beynəlxalq təhlükəsizlik məsələləri baxımından da əhəmiyyət daşıyır. Fikirlərimin sonunda qeyd etmək istəyirəm ki, Frank-Valter Ştaynmayerin səfəri Azərbaycan-Almaniya əlaqələrinin yeni mərhələyə keçməsinə təkan verəcəkdir.
Nəriman Güləhmədov;
Neftçala rayon ziyalısı
