"Azərbaycan dili bizim kimliyimizi müəyyən edən ən vacib amildir".
Liderxeber.az xəbər verir ki, bu sözləri Dövlət İmtahan Mərkəzinin İdarə Heyətinin sədri Məleykə Abbaszadə "Azərbaycan dili üzrə sertifikasiya imtahanı"nın onlayn platformasının təqdimatında çıxışı zamanı deyib.
O bildirib ki, hazırda sözügedən platformanın ilkin versiyası təqdim olunur:
"Bu platforma bizə şəxslərin Azərbaycan dili ilə bağlı biliklərini yoxlamağa imkan verəcək. İmtahandan keçən hər kəs anket məlumatlarını daxil etməlidir.
Bizə kimin neçə bal topladığı önəmli deyil. Bu məlumatlar bizə hər bir sosial təbəqənin hansı biliklərə sahib olduğunu öyrənmək üçün lazımdır".
Məleykə Abbaszadə qeyd edib ki, Azərbaycan dilinin itməməsi üçün çalışmalıyıq:
"Azərbaycan dili hər bir sahədə olduğu kimi elmi sahədə də inkişaf etməlidir. Nəyə görə əvvəllər rus, indi isə ingilis dilində dissertasiya işlərinin yazılması tələb olunur? Bu, yazıların dünyanın bilməsi üçün lazımdır. Buna görə də Azərbaycan dili elmi sahədə inkişaf etməlidir. Yoxsa biz öz dilimizi itirə bilərik".
Sədr vurğulayıb ki, hazırda ilkin versiyasının təqdimatı keçirilən bu platformanın data məlumatları üçün 2000 nəfərin imtahanda iştirak etməsi lazımdır:
"Mən istəyərdim ki, elə burada əyləşən müəllimlər, habelə Yazıçılar İttifaqının üzvləri bu prosesdə iştirak etsinlər. Data üçün bizə 2000 nəfərin iştirakı lazımdır. Eyni zamanda, rus dilində məktəbi bitirib, Azərbaycan dilində fəaliyyət göstərənlərin nəticələrinin öyrənilməsi lazımdır".
