ABŞ Qətərlə birlikdə İranın humanitar mallar almaq üçün dondurulmuş aktivlərinin bir hissəsindən istifadə mexanizmi üzərində işləyir.
Liderxeber.az xəbər verir ki, bu barədə məlumatı "The Wall Street Journal" (WSJ) nəşri mənbələrinə əsaslanaraq yayıb.
Məlumata əsasən, ilk mərhələdə rəsmi Tehranın Qətər banklarındakı 6 milyard dollarlıq aktivinə çıxışı təmin oluna bilər. Gözlənilir ki, İran Mərkəzi Bankının müraciəti ilə Doha həmin məbləğin tibbi ləvazimatlar, qida və digər sosial təyinatlı məhsulların alınmasına yönəldilməsinə razılıq verəcək.
Bildirilir ki, qlobal miqyasda İran dövlətinin təqribən 100 milyard dollarlıq vəsaitinə həbs qoyulub. Sözügedən məbləğ sanksiya tətbiqləri nəticəsində, əsasən, Çin, Qətər, İraq və Hindistan banklarında bloklanan enerji satışından əldə edilmiş gəlirlərdən ibarətdir.
Nəşr bildirir ki, bu cür sistemin qurulması ilə rəsmi Vaşinqton İranın maliyyə xərclərinə nəzarəti həyata keçirməyi hədəfləyir. "The Wall Street Journal" əlavə edir ki, Birləşmiş Ştatlar və Qətərin birgə formalaşdırdığı bu təşəbbüsə Tehran tərəfindən hələlik rəsmi təsdiq verilməyib.