2017-07-03 09:56

Azərbaycanın Xalq artisti vəfat etdi - FOTO

Xalq artisti Xumar Zülfüqarova ötən gün 90 yaşında dünyasını dəyişib.

Görkəmli Azərbaycan rəqqasəsi, baletmeyster, Azərbaycan Dövlət Rəqs Ansamblının yaradıcısı, Xalq artisti  Xumar Zülfüqarova ötən gün 90 yaşında dünyasını dəyişib.

Bu barədə sosial şəbəkədə Əməkdar artist Məryəm Zamanova xəbər yayıb.

LiderXeber.az xəbər verir ki, X.Zülfüqarova 1927-ci il noyabr ayının 15-də Bakı şəhərində görkəmli teatr və kino aktyoru Rza Əfqanlının ailəsində anadan olub. O, 1945-cı ildə Bakı Xoreoqrafiya məktəbini bitirib. 1945-1966-cı illərdə Azərbaycan Dövlət Akademik Opera və Balet Teatrının solisti, 1966-1978-ci illərdə Azərbaycan Dövlət Filarmoniyasının Mahnı və Rəqs ansamblının solisti və bədii rəhbəri, Dövlət Rəqs Ansamblının yaradıcılarından biri, 1978-1988-ci illərdə Azərbaycan Dövlət Qastrol və konsert üzrə birliyinin ilk baş baletmeysteri olub.

Üzeyir Hacıbəylinin "Koroğlu” operası əsasında rəqs qurub, Qara Qarayevin "Yeddi gözəl” baletində çıxış edib, kinofilmlərdə rol alıb. "Şah İsmayıl”, "Aşıq Qərib”, "Əsli və Kərəm”, "Leyli və Məcnun” operalarında rəqqasə qismində mahircəsinə çıxış edib.  

1950-ci ildə Bakı Xoreoqrafiya Məktəbində pedaqoji fəaliyyətə başlayan Xumar Zülfüqarova 60 il ərzində bir neçə nəsil rəqqas və xoreoqraf yetişdirib.



Günay Cəfərova

LiderXeber.az
SON XƏBƏRLƏR


Yuxarı