2016-05-03 13:22

MTN işi: Tağı Əhmədov 3 milyonluq xərac verib?

Düşünürdüm ki, haqqımda yazılanlar bir müddətdən sonra sona çatacaq.
 
LiderXeber.az xəbər verir ki, bu sözləri Axar.az-a Bakı Metropoliteninin eks-rəisi, YAP Yasamal təşkilatının sədri Tağı Əhmədov haqqında yayılan xəbərlərə münasibət bildirərkən deyib.
 
T.Əhmədov Milli Təhlükəsizlik Nazirliyinin (MTN) Energetika və Nəqliyyat Sahələrində Təhlükəsizlik Baş İdarəsinin sabiq rəisi Akif Çovdarovla heç vaxt əlaqə qurmadığını bildirib:
 
"Düşünürdüm ki, haqqımda yazılanlar bir müddətdən sonra sona çatacaq. Ancaq görürəm ki, davamlı olaraq əleyhimə yazırlar. Qəti sürətdə deyə bilərəm ki, mənim həmin insanlarla heç bir əlaqəm olmayıb və yayılan məlumatların heç bir əsası yoxdur”.
 
Xatırladaq ki, Tağı Əhmədovun Akif Çovdarova 3 milyon manat xərac verməsi barədə məlumatlar yayılıb. Musavat.com-un əldə etdiyi məlumata görə, T.Əhmədovu 3 milyon xərac verməyə sövq edən gizli çəkilən video olub. Metropolitenin sabiq rəisindən əvvəlcə 5 milyon tələb olunub, sonra bu məbləğ bir məmurun iştirakı ilə 3 milyona qədər endirilib.
 
Sayt şantaj videosunun paytaxtın istirahət mərkəzlərindən birində çəkildiyini iddia edib.
 
Ayrıca, Bakıda fəaliyyət göstərən elit otellərdən bir neçəsinin arxasında Akif Çovdarovun dayandığı bildirilir. Rabitə və Yüksək Texnologiyalar Nazirliyinin hazırda həbsdə olan Aparat rəhbəri Vidadi Zeynalov isə həmin otellərə nəzarət edib. Rəsmi olaraq bu hotellər ayrı-ayrı MMC-lərə məxsusdur. Bu otellərin V.Zeynalova aidiyyətini dolayısı ilə təsdiqləyən məqamlardan biri də Rabitə və Yüksək Texnologiyalar Nazirliyinin balansında olan ərazilərdə yerləşmələridir.

Səbuhi Vaqifoğlu

LiderXeber.com
SON XƏBƏRLƏR


Yuxarı